Framsyninga i Lesja kulturhus fredag kveld var full av talent. Nokre hadde stått på denne scena med publikum mange gonger før, andre var heilt ferske.

Og det er ikkje fare for at sanggleda og underhaldningstrangen skal bli mindre i Lesja framover, heller. Trykket i kulturlivet for barn og ungdom i bygda ser ut til å halde seg.

Og denne kvelden var det ei side av kulturen som skulle lyfte ei anna. Dommar og linjemenn mangla, men det var full innsats frå alle spelarar i to heile omgangar. Lesja IL sin Norway-cup-komité sto bak arrangementet, for å gjera ein vri på pengeinnsamlinga til den store fotballturneringa i sommar.

For dei som kom til kulturhuset var det både dans og sang, spel og skodespel, debutantar og veteraner. I pausa og etter framsyninga var det mange som hadde mykje godt å seie om ungdommane sin innsats.

- Det skal ikkje bli vanskeleg å halde fram med musikal på Otta, når ein har slik å hente frå, smilte ei vi prata med.

Då det vart blese i fløyta etter siste omgangen var det eit lag som framleis kjem til å halde seg i øvste divisjon framover, som gjekk av banen. Så blir det spennande å sjå til sommaren, om dei syng og dansar motstandarane ut av cupen...

Sjå fleire bilete i avisa torsdag.

Synne Vorkinn og Kaisa Heidsve syng Rihanna sin song Stay. Foto: Lokalavisa Vigga
Blide og flinke programleiarar Lina Asora Storhaug Rognerud og Torill Rognerud leidde publikum gjennom eit program med i alt femten innslag. Foto: Lokalavisa Vigga
Mange Lesja-lag skal til Norway-cup, men det kostar pengar. Ein ny måte å samle inn dei tiltrengte kronene var å arrangere ein konsert av og med fotballungdommane. Foto: Lokalavisa Vigga
Magnus Morken prøvde seg med hell på "Apache" av Shadows. Det var der Øystein Sunde starta, òg... Foto: Lokalavisa Vigga