Landslaget for lokalaviser (LLA) og Mediebedriftenes Landsforening (MBL) la denne veka fram nye opplagstal for heile avisbransjen.
Tala viser antal abonnentar for dei ulike avisene i første halvdel av 2022.
Da hadde Vigga eit samla opplag på 2317 abonnentar. Det er ein nedgang på fem abonnentar samanlikna med same tid i 2021.
Av dei 2317 er 805 av dei berre digitale, 95 har berre papiravis, medan 1417 har komplett abonnement. Det inneber dei som har både papir- og nettavis.
Oversikta over aviser i vår omkrets ser slik ut:
Avis | Første halvår 2022 | Første halvår 2021 | Endring i opplag |
Vigga | 2 317 | 2 322 | -5 |
Gudbrandsdølen Dagningen | 22 749 | 22 772 | -23 |
Dølen | 4 469 | 4 355 | 114 |
Fjuken | 3 754 | 3 790 | -36 |
Norddalen | 2 517 | 2 612 | -95 |
Åndalsnes Avis | 3 360 | 3 404 | -44 |
OPP | 4 304 | 4 028 | 276 |
Samanlikna med året før har mengda heildigitale abonnentar gått opp for Vigga sin del. Ved første halvår i 2021 var dette på 714, medan det i år var på 805.
– Sjølv om nedgangen er liten, skulle vi gjerne sett at pila peiker oppover. Men positivt er det at fleire får nytte av digitalt abonnement. Det er viktig for oss å ha ei levande nettavis med dagsaktuelt innhald - og andre ting som folk kan ha glede av å lese, seier redaktør og dagleg leiar i Vigga, Simen Rudiløkken.
– Vi har vore gjennom eit år med utskiftingar, som har ført til at vi har måtte omstille oss, men også gjeve oss moglegheiter til å tenke nytt. Eg føler vi no er inne i ein god flyt att, og skal fokusere meir på innhald som engasjerer i tida framover, fortset han.