2469 meter over havet, i Jotunheimen, ruvar Galdhøpiggen, det høgaste fjellet i Noreg og i Nord-Europa. Den er ein av dei fjelltoppane i landet som er mest besøkt, mykje grunna at den er lett å bestige. Berre eit lite knippe personar har entra toppen i fallskjerm, og Kjetil Rognerud (46) frå Lesja var den aller første.

Reklamestunt

Kjetil er den mellomste av dei tre Rognerud-brørne som alle har vore sentrale i fallskjermmiljøet på Lesja. I år 2000 vart Lesja Fallskjermklubb (LFK) kontakta av aktivitetsselskapet Aktivitet Vågå, med førespurnad om å gjere eit reklamestunt for Arnesen Bil AD, som skulle ha firmasamling på Galdhøpiggen.  LFK tok sjølsagt på seg oppdraget, og Håvard Rognerud vart sett på saka.

På sparket

Tidleg om morgonen 12. august 2000 fekk Kjetil Rognerud ein telefon. Det viste seg at broren Håvard som skulle stå for hoppet på Galdhøpiggen, vart utkalla på jobb. Kjetil steppa da inn for broren.

- Eg tok utfordringa på strak arm, og vart med Audun Nordsletten i småfly frå Bjorli Flyplass, fortel han.

- Med eit stort reklamesegl med logoen til bilimportørfirmaet på skjermen, landa eg på ein snøkledd liten flekk utanfor hytta på toppen, der dei tilsette i firmaet hadde samling. Eg fekk servert eit glas champagne, og feira at eg var førstemann ut med dette stuntet. Håvard, bror min, er framleis ganske harm på meg for dette, ler Kjetil.

Stor respons

Men avisoppslaga og kreditten for å vera først, gjekk til Voss.

- Eg tykkjer absolutt vossingane fortener heiderleg omtale for hoppinga, men det hadde kanskje vore lurt å sjekke opp historia litt betre før ein kuppar andre sine rekordar. Til Voss må eg berre seie «velkomen etter», men rekorden tilhøyrer Lesja Fallskjermklubb!

Og dette er det nok mange som er einige med Kjetil i. Det har vore stor respons på artikkel frå VG. Både på riksavisa sine kommentarfelt og på nettstaden facebook har det kome reaksjonar på den påståtte rekorden.

- Eg sjølv fekk beskjed om at rekorden min var kuppa gjennom ein sms frå ein kamerat av meg som er i Seoul i Sør-Korea. Han hadde lese VG på nett, og var ikkje fornøgd med at nokon andre hadde tatt på seg æra for noko eg gjorde for tolv år sidan.

Fleire rekordar

Lesja Fallskjermklubb sin styreleiar Håvard Rognerud vart «snytt» frå å vere førstemann i fallskjerm på Galdhøpiggen. Men han har framleis rekorden med utførte tandemhopp på norsk grunn. Dette er ikkje dei to einaste rekordane LFK kan skilte med.

- Basehopping i Trollveggen starta i 1980. Ei tid seinare, eg er ikkje heilt sikker på årstalet, byrja vi å hoppe ut i fallskjerm frå fly tett innved fjella i Romsdalen, som dei første i verda, fortel Kjetil.

Heilt til slutt, for å gjere det klart ein gong for alle; den første til å lande i fallskjerm på Galdhøpiggen, var ein lesjing; Kjetil Rognerud. Det er ikkje utan grunn at han har fått tilnamnet Piggen.

"Piggen" var førstemann i verda til å lande i fallskjerm på Galdhøpiggen for 12 år sidan. Foto: Lokalavisa Vigga
"Piggen" var førstemann i verda som landa i fallskjerm på Noregs høgaste fjell. Foto: Lokalavisa Vigga
Galdhøpiggen. Foto: Hans Erik Kjosbakken/Fjuken Foto: Lokalavisa Vigga