I helga arrangerte skikrinsen i Oppland hoppskule og krinshopprenn i Dovre. Utan ein einaste dovring.
- Kva er det med dovringane? Dei har jo moglegheitene, seier Torfinn Scheie frå Sør-Fron IL.
Han har vore med på dovrerenna sidan 2010, og i år er det toppnotering med tal på deltakarar. Men altså ingen deltakarar frå Dovre.
- Langrennsstyrte skigrupper
Scheie er trenar, eldsjel og pådrivar for hoppsporten i heile dalen, men greier ikkje å få med seg dovringane. Sjølv om, som han seier, Dovre har av dei beste hoppanlegga i Gudbrandsdalen.
Han har ein teori om at nedgangen for hoppsporten skuldast langrennsstyrte skigrupper i idrettslaga rundt omkring.
- Dei legg ned hoppbakkar i heile Gudbrandsdalen, og har ein ikkje anlegg, blir det ikkje rekruttering, meiner han.
Men noko forklaring på kvifor Dovringane med sine flotte anlegg utblir, har han ikkje.
Hopprenna, i helga foregjekk laurdag og sundag både i Klukkarhaugbakken og i Jøndalsbakken, og til saman deltok omlag 70 hopparar, frå Tormod skilag, Sør-Fron IL, Lensbygda, Søre Ål, Gausdal, Nansen, Tolga, Fåset og Alvdal. Og Lesja.
Lesjing i siget
For hoppar Håvard Kraugerud Rønningen (9) er frå Lesjaverk, og interessa skuldast kanskje ein over snittet ivrig far, Martin Rønningen, som styrte flagget i hoppbakken laurdag.
Klassekamerat til Håvar, Mateusz Marek Klimczak (9), var med på hoppskulen også, saman med heile familien Kraugerud Rønningen, med Mamma Siv Reenaas Kraugerud og bestefar Johan Rønningen, i tillegg til småsystrene til Håvard, Silje (6) og Jenny (3). Og båe var utfor i hoppbakkene som var stelt i stand for hoppskulen. Vinstra-hopparen Kristian Brenden, som var med i verdenscupen på 90-talet, hadde instruksjonar til alle på hoppskulen.
Familieutflukt var det også for fleire, frå Sør-Fron kom Ola Brenden (5), som allereie før prøveomgangane vridde kneet sitt. Saman med bestemor Anne Brenden tok han ei pause medan skada vart vurdert.
Hoppdress, hjelm og alt anna er på stell, og han har nok plukka opp korleis ting skal gjerast av storebror Petter Brenden (11).
Og Ola har tru på at kneet blir i orden att fort.