Temaet for avslutninga for heile barneskulen onsdag skulle vere Alf Prøysen, sidan det er jubileumsår til den folkekjære Prøysen i år. Alle klassane hadde to nummer kvar. I staden for å synge dei kjende songane, valgte 2. klasse ein ny versjon, laga av Ole Ivars. Det er ein hyllest til artisten, og er spelt inn til det nye albumet dansebandet kom med i år.

Men andreklassingane fant ikkje instrumentalversjon av songen. Kontaktlærar Ole Petter Bueie tok kontakt med Bjørn Elvestad, dovring og medlem i Ole Ivars i snart 20 år.

Innspeling i retur

Elvestad har sjølv vore elev på Dombås skole, og ville gjerne hjelpe klassa til å få ei fin avslutning. Han har studio heime, og spela like godt inn songen på nytt.

– Eg hadde tid til å gjere det, og brukte ikkje mange timane på det. Eg var med på innspelinga på Gjøvik, og har songen i blodet, fortel han.

Klassa har spelt inn sin versjon, som dei vil sende i retur til Ole Ivars. Dei vil også sende eit uhøgtideleg spørsmål om Ole Ivars treng korhjelp under Dansefestivalen på Sel.

– Det hadde vore koseleg å få ei innspeling i retur. Det er full rulle med turne fram mot jul nå. Dansefestivalen i Sel og Seljord er dei to største, men det er artigast å spela på Sel, der er det mykje kjentsfolk, seier Elvestad.

Innspeling på skulen

Andreklassingane har øvd på songen i lang tid. Bueie fekk ideen frå Spelemannsprisen som gjekk på TV tidligare i år. Han kjenner dotter til Bjørn Elvestad, Ingunn, som bur på Dovre. Det var slik han kom i kontakt med bandmedlemmet til Ole Ivars. I tillegg til songen hadde klassa også eit høyrespel om geitekillingen som kunne telle til ti.

Med hjelp av lærerstudent Sturla Hage spelte dei inn songen på skulen, og Ole Ivars kan vente seg ein versjon i posten med fleire songspirar på.

Høyr songen her: