Den har nok hatt ein hard start på livet, kattungen som Laura Skorpa Melvær tok hand om, då ho besøkte dotter si i Trondheim. Tett ved bymarka hadde katten levd ute, og tynn og forkomen var han. Plana var å ta han med heim til Florø, men då Melvær skulle ta ein rast på Dombås, smatt han ut.
To veker ute åleine
Dette var den 22. september, og etter annonser i Vigga fekk Melvær kontakt med mange engasjerte folk.
Den glade katteeigaren ringer avisa for å takke alle dei som har brydde seg, via meldingar og telefonar.
- Eg må få takke alle saman, særleg kanskje Anna Hestdal, der han søkte ly under altanen og fekk han litt mat, seier ho takksam.
No er han i fin form, har vore hjå veterinær for vaksine og ormekur.
-Det var frå under altanen til Anna at vi etterkvart fekk tak i han, seier ho, om bergingsaksjonen førre laurdag. Då hadde pusen greid seg aleine på Dombås i to veker. Tilslutt fekk dei lokka han inn i transportburet Melvær hadde med, og heimturen gjekk fint.
Kva blir namnet?
Dei to vekene aleine på Dombås, tykkjer ho er godt gjort utan å bli overkjørt. Pus, som enno er namnet hans, er ein uroleg krabat, truleg omkring tre månader gamal. Melvær seier han kjem til å få eit anna namn etterkvart.
-Eg tykkjer det må bli noko som kan seie litt om den spesielle historia hans, seier ho.
Kanskje lesarane våre kan hjelpe til?