Tre og fire karar har jobba med flytebrygga den siste tida. Frå denne veka har dei pause fram til slutten av august, men konturane av brygga er klart synlege.
Neste månad
- Vi satsar på å montere brygga i august, fortel nestleiar i LHL Lesja og Dovre, og for tida snikkar, Leif Sortodden.
Prosjektet er eit samarbeid mellom LHL Dovre og Lesja, Lesja Jeger- og Fiskerforening, Kvekroken Entreprenør, Ny Giv i Lesja, Lesja Røde Kors og Lesja kommune.
Forrige onsdag arbeidde Sortodden, Svein Stuen og Vidar Ungersnæss frå Lesja og Magne Rudiløkken frå Dovre med brygga.
- Det var utruleg sur vind onsdag, vi måtte ha lengre pauser i bilen for å halde varmen, seier Sortodden.
Forskjellige organisasjonar har bidratt til brygga, som har eit budsjett på 230 000 kroner.
Gapahuk og grillstad
Brygga blir tilpassa rullestolbrukarar og bevegelseshemma, og no står det att ein del graving ved Bryggeosen på Lesjaskogsvatnet. Det blir også gapahuk og grillstad ved brygga.
- Garanterar dykk at fisken bit då?
- Nei, det garanterar vi ikkje i det heile tatt, ler Sortodden.
