Møtte jerv med valper
Til hest
Vorkinnslien kom onsdag frå Ulekleivsetrene, og hadde akkurat kryssa Hestdalsbekken på ryggen av hesten Vesla, då ho fekk sjå jervtispa med tre unger. Dei fire var omlag 150-200 meter unna, og let seg ikkje forstyrre synleg av gjetaren. Rett etterpå såg Vorkinnslien ein hannjerv, synleg større enn tispa, litt lengre unna.
- Eg hadde akkurat sett ei sjedde med to lam, før eg møtte på jervane, fortel Vorkinnslien.
Hesten var ikkje særleg påverka av møtet, fortel ho. Fredag var Vorkinnslien innover att i same området. Kåre Bakken frå Dovreskogen gjekk også innover med kadaverhund fredag, men måtte snu på grunn av tett skodde.
Det er ikkje funne kadaver etter jerven så langt.
Familiegruppe
- Det er mest sannsynleg den same tispa som vart observert førre veka, seier Esben Bøe, rovviltansvarleg i SNO.
Han seier ei anna tispe i same leveområde ikkje ville bli tolerert av den fyrste. Hannjerven meiner Bøe truleg er far til ungane.
- Dersom det ikkje hadde vore hans ungar, ville han truleg drepe dei, for å få para seg og sikra eiget avkom, seier Bøe.
Han fortel at jervtispa kan vera interessert i hannen frå april til august. Jerven får ungar i februar/mars.
SNO sender rapport på denne observasjonen etter den førre, med nok eit observasjonsskjema, til Rovdata. Det er dei som avgjer om observasjonane kvalifiserer for å stadfeste yngling i dette området.