- Dette er på ein måte sju års oppsummering, og no må vi ta ein oppvask på dette, seier gruppeleiar for Arbeidarpartiet i Dovre, Øyvind Frich.

Han peikar på at dette har vore tema fleire gonger i dei to siste periodane, med organisering av møte på ein ordentleg måte.

Bakgrunnen for at det kjem ei slik innkalling no, er kommunestyremøtet måndag kveld, der debatten i samband med mellom anna økonomiplan vart svært oppheita.

Frich seier han har sett seg lei på det han meiner er ein ukultur som hindrar konstruktivt samarbeid mellom opposisjon og posisjon til beste for kommunen. Han påstår at representantar i kommunestyret føler ubehag ved å berre vera til stades i møte, og fryktar for rekrutteringa til politikken.

Utan ordføraren

Tysdag vil han møte gruppeleiarane i Høgre og Senterpartiet, i tillegg til dei uavhengige representantane i kommunestyret.

- Kva er grunnen til at de ikkje ber med ordføraren, han som skal ha møteleiinga i dei viktigaste kommunale organa?

- Dette møtet blir utan Fasteraune, fordi vi har prøvd å få til endring i alle fora der han er med. Vi må rett og slett gå på andre, og vil freiste å bli samde oss gruppeleiarar og uavhengige imellom, seier han.

Frich er lei av å bli peikt på som ein som må gå i seg sjølv når det gjeld å skape godt klima, og meiner ordføraren også må gå i seg sjølv.

- Han er ordførar for alle i opposisjonen også, seier Frich.

Ordføraren er komfortabel med eit slik møte, til trass for at han ikkj er invitert.

- Dersom ein føler det er konflikter og dårleg klima, er positivt at ein tek eit initiativ til å få det betre, seier Fasteraune om møteinnkallinga.

- I Vigga den 25. september avviste du påstanden frå Øyvind Frich om dårleg politisk klima. Har du forandra meining?

- Nei, det har eg ikkje. Det er vel nokon som opplever at det å vera i opposisjon er vanskeleg, men eg opplever at vi gjennomfører møte og løyser dei politiske oppgåvene på ein god måte, eg. Dersom nokon oppfattar det på ein annan måte, lytter vi sjølvsagt til det, og freistar å gjera noko med det, seier han.

Ansvarsfordeling

- Når vi har sitte i åtte år utan å få gjennom noko som helst, og vi samstundes blir skulda for all elendigheita, kan ein ta til å lure på kva som går føre seg, seier Frich, og syner til debatten i kommunestyret måndag, der fordeling av ansvaret for det økonomiske uføret til kommunen vart eit heitt tema.

- Fleire reagerte på det dei oppfatta som personangrep i møtet måndag, nokon fortel at det gjekk utover nattesøvn, du er ordførar, kommentar?

- Det er eit dilemma når ein skal bryte inn, eg oppfatta ikkje at det er personangrep på det siste møtet, og at det ikkje var grunn til å bryte inn. Men det vart etterkvart ein tone, som absolutt kunne vore betre, men personangrep, det meiner eg ikkje det var, seier han.

Han meiner det går på usemje om sak og prosess i føregåande saker.

- Måten du styrde møtet på vart kommentert undervegs, det vart bedt om at det ikkje skulle vera samtale over bordet. Kva er grunnen til at du ikkje brukar talerstolen?

- Vi har jo diskutert i høve til reglement om ordførar kan sitje på stolen sidan han har mikrofon, medan dei andre skal bruke talerstolen. Eg meiner eg er ganske tydeleg på å skilje innlegg og møteleiing i møtet. Men det er klart vi kan sjå på det, seier han.

Les fleire sakar frå vekas politiske møtar papirutgåva torsdag.