Dei to reiser annankvar helg til mora på Jessheim, og brukar toget.
- Det er ikkje så mange alternativ, seier Emilie då vi treffer ho etter skulen måndag.
Ikkje tog, ikkje buss
NSB: For dyrt med buss for tog
- Då vi kom til Lillehammer, var vi 12-15 personar som skulle vidare oppover Gudbrandsdalen. Der var det ingen buss, ikkje tog, ingen personar å kontakte hjå NSB. Vi fekk heller ikkje kontakt med kundetelefonen til NSB, fortel Emilie.
Bussjåføren som hadde frakta dei til Lillehammer, ordna heldigvis opp.
Motstridande meldingar
Emilie er ikkje imponert over informasjonen dei mottek undervegs, når dei kom i kontakt med ulike vegleiarar frå NSB. Ein meiner dei skal med Rørosbanen, ein annan opplyser om at det er tog frå Lillehammer. Til saman får dei fem motstridande meldingar om transportmiddel, frå dei kjem til Gardermoen, og til dei er framme på Lillehammer med bussen.
- Om vinteren plar det gå ganske greit, men med ein gong det blir vår er det ofte tull. Det verkar som dei gløymer at det er folk som skal til Gudbrandsdalen, seier ho.
-Vi stiller opp
Kommunikasjonssjef Åge-Christoffer Lundeby i NSB legg seg flat for historia til Emilie og broren. Avgangen deira skulle ha erstatningsbuss, også frå Lillehammer. Det er nemleg eit regiontog med forlenging heilt til Dombås, og NSB har statsstøtte for å drive denne ruta.
- Det er heilt innlysande at informasjonen undervegs her har svikta, det er berre å beklage. Det skulle ha vore informert om buss vidare, og det skulle ha vore buss vidare, seier han, og ber dei ta kontakt om hendinga.
Han understrekar at dete er ein svikt, og at alle som har billett, skal få transport.
- Har du billett, så stiller vi opp.
I tilfellet med Emilie, Eirik Magnus og dei andre var det bussjåføren frå HMK som stilte opp. Han ringte etter maxitaxi til dei opprådde nsb-kundane, som skulle til stasjonar så langt nord som Dombås. Emilie og broren var heime to timar seinare enn dei brukar sundag kveld.